O día 28 dotubre zaguero lo representan dAragón que partezipaba en o Consello Plenero da Comunidá de Treballo dos Perinés, o Consellero Javier Velasco, se bió interpelato debán dos representans dos gubiernos dAndorra, Nabarra, Cataluña, Aquitania, Meyodía-Perinés, País Basco e Luengadoc-Rosellón e de más de 400 asistens por un serbidor. Se trataba de saper por qué os decumentos, cartels, imbitazions, programas e material audiobisual que produze e manulla ista eurorrechión amanixen en franzés, español, catalán, basco e oczitano e no pas tamién en aragonés.
Ya sentí que fuese prezisamén Javier Velasco qui recullise iste repropiamiento, ya que, como chestor e politico, li atrebuigo un alto libel deficazia, asinas como una autitú onesta e positiba poco frecuén entre as chens que sadedican á ra cosa publica (á ra que sumo una ubierta simpatía presonal). Pero li tocó ixe día estar o representán aragonés e yera de dar -si me premiten a espresión- sacar-le as colors á o nuestro gubierno sobre iste particular.
Porque no ye almisible que a luenga perinenca más menazata, la que más nezesita de bisibilidá e uso, la más inorata e, prebablemén, espernita de totas ellas contine estando ausén da Comunidá de Treballo dos Perinés dende a suya fundazión allá por 1983. En os suyos primers tiempos, con o remerato José Bada como Consellero de Cultura da Deputazión Cheneral dAragón se tenió o cudiato u delicadeza de fer una bersión en aragonés do suyo manifiesto fundazional e ordinazions. Pero dimpués dalabez, ni zarrapita daragonés.
E no se bale dizir que no tener una lei de luengas (que en tenemos dende fa ya una añada) no feba posible tal cosa: a luenga oczitana no ye ofizial en Franzia, ni tiene sisquiera una reconoxedura legal como laragonés en Aragón, pero grazias á ra conzenzia das autoridaz rechionals franzeses (de totas as colors politicas, por zierto) a luenga oczitana fa tiempo que semplega profusamén en a Comunidá de Treballo dos Perinés. Ye de pensar que, ya que loczitano ye declarato luenga ofizial en a Bal dArán por una lei da Cheneralidá de Cataluña dende o mes de setiempre, o suyo emplego no irá prezisamén á menos en o sino dista organizazión.
Velasco, que enzetó contestando desazertatamén (dizió que iste feito no yera responsabilidá do Gubierno dAragón), endrezó a suya respuesta con un compromís de meter en pie lo nezesario ta emplir ixe bueito lingüistico. Cuento con que asinas será, pero cal no baxar a guarda: ta enzetar, ye en paranza una campaña de promozión turistica dos Perinés (tetulata "2011 año de los Pirineos" -e feita tamién en as atras luengas ementatas, no pas en aragonés) en la que os miembros da Comunidá de Treballo ban á dixar-sen buenos diners ta dar á conoxer a nuestra cultura, atrautibos e idiosincrasia por tot ro planeta. Asperemos que, en metendo remeyo á ista endinante ausenzia, o lanzamiento dista campaña no seiga atra oportunidá perdita -una más entre tantismas- ta laragonés e ta la rica dibersidá da cultura aragonesa.
Fuente: www.aragondigital.es
