Bocabulario de Murillo de Galligo ye un treballo de replega de bocabulario feito de conchunta por Liena Palacios Rasal e Chan Baos Muñoz.
En o o bocabulario de Murillo de Galligo se troba de forma ampla, anque no completa de raso, o bocabulario local de Murillo (probinzia de Zaragoza, pero comarca d’a Plana de Uesca) que os autors han ito replegando en as zagueras añadas, dende 1998, de boca de os morillanos. Más que más se trata d’un bocabulario propiamén aragonés, anque bi abrá bellas parolas que tamién s’empleguen en castellano. Debán de a duda, os autors han preferito no quedar-sen curtos. En chunto, son arredol de 4.000 dentradas. Que balga ista contribuzión como un cantal más ta continar construyindo a gran casa d’o nuestra idioma, l’aragonés.
Mª Liena Palacios Rasal ye filla de Murillo, naxita en Uesca. Ye lizenziata en Filosofía e Letras e Diplomata en Biblioteconomía e Decumentazión. Miembro d’o ligallo de Fablans de Zaragoza, an ha desembolicato un firme treballo d’esfensa d’a luenga aragonesa. Estió colaboradora en o Vocabulario de Zuera de Jesús Marco Borque. Ha treballato en o proyeuto d’o Tresoro d’a Luenga Aragonesa d’o Instituto de Estudios Altoaragoneses e partizipó en a elaborazión de Fuens lesicograficas de l’aragonés dende o sieglo XVII dica 1998.
Chan Baos Muñoz, naxito en Zaragoza, ye teunico de laboratorio. Miembro d’o ligallo de Fablans de Zaragoza, gran conoxedor e esfensor d’a luenga aragonesa. Mayestro de luenga aragonesa. Comunicador en diferens meyos de comunicazión escritos, como Heraldo u Siete de Aragón, e radios zaragozanas, como Radio Topo, Radio Las Fuentes, Radio Ebro u COPE, astí de conchunta con Liena Palacios.
